Joan den ostiralean martxoaren 8a izan zen eta Emakumearen eguna ospatu genuen. Lehenengo patioan HH, LH, DBHko ikasleak eta irakasleak elkartu ginen kanpoan argazki bat ateratzeko. Horren ondoren, Maite Ruiz De Larramendi eta Maider Otegi etorri ziren beraien esperientzia kontatzeko. Urteetan zehar beraien ibilbidean izandako oztopoen berri eman ziguten eta beraien borrokak zein izan diren azaldu ziguten. Horretaz gain, gaur egun pilotan emakumeek duten egoera ere kontatu ziguten. Azkenik horri buruzko “Las pelotaris” dokumentala ikusi genuen. Oso interesgarria izan zen eta eskerrak eman guregana etortzeagatik.
Eski astea 2024 LH5-6
Otsailak 26 martxoak 1eko astean Lehen Hezkuntzako 5 eta 6.mailako ikasleak Aste Txurian egon ginen, Izaban. Gure lehenengo aldia zen kanpaldi batean 4 gau eta 5 egun pasa behar genituela, eta pixkat urduri geunden, gainera, gehienek ez genekien eskiatzen eta hori beste erronka bat ere bazen.
Lehenengo egunean, Izabara iritsi, frontoian hamaiketakoa hartu eta bakoitzari zegokien eskietako botak eman zizkiguten, hartu eta Ferialera igo ginen. Dena elurtuta zegoen eta elurra hari zuen momentu horretan ere. Gure monitorea izango zena ezagutu, eskiak hartu eta eskiatzeko lehenengo kontaktuarekin hasi ginen. Lehenengo toki lauean, nola erori eta nola altxatu erakutsi zigun, ondoren aldapak igotzen eta jeisten hasi ginen poliki poliki.
Ondoren bazkaldu eta Izabako Hotelera jeitsi ginen, bertan egin genuen lo aste guztian. Hotelean oso gustora egon ginen. Zubiriko eta Erroko ikasleak ere bertan ziren. Hotelean jolasteko gela bat utzi ziguten eta batez ere gaueetan erabili izan genuen mahai jolasetan ibiltzeko. Bazkal ondoren, denbora libre genuenean, herritik ibiltzen ginen, frontoian jolasten, enparantzan… jolasteko materiala genuen eta monitore batzuk bertan ziren ere laguntza behar izanez gero. Ondoren 18:00etatik 20:00etara gutxi gora behera, beste ekintzak genituen.
Goizero eskiatzera joaten ginen, baina elur asko egin zuenez, Mata de Hayan gelditu ginen aste osoa. Bertan ez ziren aldaparik ia-ia, baina gustora aritu ginen eta eskiekin jolas ezberdinak egin ahal izan genituen.
Oso ongi pasa genuen eta errepikatzea gustatuko litzaiguke!
HONDAKINEN KUDEAKETA IKASTEN…
Ingurugiroa zaintzeko aldarria eginez hasi dugu martxoa Garraldako institutuan!
Gaur, martxoaren aurreneko egunean, Bidausiko Jon etorri zaigu ikastetxera. Bertan, bi saio burutu ditu, DBHko 1. eta 2. mailetakoko ikasleekin lehenik eta 3. eta 4.ekoekin, ondoren, etxeetan zein eskolan bertan egiten dugun hondakinen kudeaketari buruz hausnartzeko. Ikasleak, taldeka lanean aritu dira eta hondakinen kudeaketako faseak landu dituzte: prebentzioa, berrerabilera, birziklatzea eta zabortegietara bideratzea. Ondoren, gaizki egiten denaren inguruan ere hausnartu dute, zonaldeko edukiontzien argazkiak ikusi ostean. Eta azkenik, konpostaren inguruan bete beharreko lau pausuak landu dituzte: hondakinak bereiztea, edukiontzian biltzea, nahastea eta materia lehorra eranstea. Eskolan bertan, konpostaren prozesua ongi egiten dela bermatu nahi dugu, eta hau izan da horretarako eman dugun lehen pausoa.
Goazen ba bide onetik eta jarrai dezagun lanean!
EUSKARAZKO MUSIKA ENTZUN NAHI??
Hementxe dituzu euskaraz musika entzuteko abesti zerrendak adinaren arabera sailkatuak.
Kalitatezko Ikastetxea
2007-2008 ikasturtean Garraldako ikastetxeko zuzendaritzak ikasturte hasieran urtero zeuden zailtasunen aurrean, kalitate-sarean sartzea erabaki zuen. Izan ere, Haur Hezkuntzako eta Lehen Hezkuntzako ikasle-taldeak urtero aldatzen ziren, eta, gainera, irakasleen klaustroak oso egonkortasun txikia zuen, eta ondorioz, ikasturtearen hasiera ia berritik hastea zen. Ikastetxeetan Kalitatea Kudeatzeko Sistema, (IKKS), jarraitzeko aukera honekin helburu garbi bat genuen: Garralda ikastetxeko antolaketa finkatzea.
Ordutik Kadineteko lankideen gidaritzapean lanean jardun dugu; gure ikastetxearen antolamendurako beharrezkoak diren prozesuak sistematizatuz. Urte luzez “Kalitatearekin konpromezua” aitorpena izan dugu.
Hezkuntza departamentuak Ikastetxeetan Kalitatea Kudeatzeko Sistema (IKKS) berria argitaratu zuen 2020an. Ordutik araudi berrira egokitzeko lana burutu dugu eta 2023ko udaberrian pasatutako kanpo auditoretzaren ondoren, “Kalitatezko Ikastetxea” aitorpena lortu dugu.
2024ko urtarrilaren 26an Nafarroako bertze hainbat ikastetxerekin batera, aitorpena jaso genuen Iruñean antolatutako ekitaldi batean. Bertan Garraldako ikastetxearen esperientzia azaltzeko aukera izan genuen.
Kalitateak gure ikastetxea ongi antolatzen laguntzeaz gain, gure eguneroko jarduna hobetzen jarraitzeko bidea emanten digu. Aitorpen berri honekin hobekuntzan lanean jarraitzeko bultzada jaso dugu.
IGAUTREAK 2024
Otsailaren 9an eskolako inauteriak ospatu genituen eta ikasleak zein irakasleek parte hartu genuen. Aurtengo gaia KOLOREAK izan zen eta guztion artean ortzadarreko koloreak osatu genituen:HH-LH1 arrosa, LH2 morea, LH 3-4-5-6 berdea, DBH1 laranja, DBH2 horia, DBH3 gorria eta DBH4 urdina.
Patio ondoren, fanfarrearekin herrian barna kalejiran ibili ginen. Gero, eskolako pistan ekitaldia burutu genuen. Bertan, Herri Berri istorioaren bidez talde bakoitzak aukeratutako abestia dantzatu zuen. Ekitaldiarekin amaitzeko, denon artean Polka Pik abestia dantzatu genuen ortzadarreko koloreen ordena jarraituz, modu honetan ORTZADAR handi bat osatuz.