Administrador

IkasNOVA 23/24 ikasgelen deialdian lortutako dirulaguntzari esker, IkasNOVA gela sortu da Garraldako eskolan. Ikasgela hau ikasteko leku aktiboa da, ikasteko modu desberdinak eta askotarikoak esperimentatu ahal izateko, eta, bertan, hitz eginez, elkarlanean eta berdintasunezko testuinguru batean partekatuz ikasten da. Altzari malguak eta mugikortasun handikoak aukera ematen dute esperientziazko, partaidetzazko eta digitalizatutako lanak egiteko. Funtsezko gaitasunak eta gaitasun espezifikoak garatzeko gela egokiak dira, ikasle guztien inklusioa errealitate bihurtzeko, Ikaskuntzarako Diseinu Unibertsalaren jarraibideei jarraituz. Gainera, ikasgelari ematen zaion teknologiak balio erantsia ematen dio, hau da, lana aberasten du eta ikaskuntza hobetzen du, konpetentzia digitalaren garapena bermatuz.

Azaroaren 13an Ornitolanekoekin batera ornitologoek hegaztiak nola eraztuntzen dituzten ikasi dugu . Teknika honekin , sareen bidez txoriak harrapatu eta neurtu eta pisatu ostean, eraztuna jartzen zaie. Horrela, sailkatu eta kontrolatu daitezke ikerketa zientifiko ezberdinetan. Amilotxak,gailupak,buztanluzeak…txori txiki ezberdinak, baina ehundaka kilometro bidaiatu dezaketenak.

Azaroaren 6an Pirinio osoko eskoletako DBHko ikasle euskaldunek Piritopaketa bat izan zuten Otsagabian. Urtean behin egiten dira Piritopaketak, bakoitza bailara batean eta aurten Zaraitzuri egokitu zaio. Asteazken horretan joku olinpikoak eta Pirinioko kirolariekin hitzaldiak egin zituzten. Lehenik eta behin, olinpiadetarako irakasleak eta ikasleak taldeetan banatu ziren: DBH1-2n bost talde egin ziren, DBH3-4n beste bost eta irakasleak bi taldetan. Bost joku egon ziren: zonbi jolasa, boley bola, oreka-erronka, herri-kirolak eta futbola. Taldeka, Otsagabiko toki desberdinetara joaten ziren eta han zenbait jolas egiten zituzten, talde bat beste baten kontra. Irakasleen taldeek ere ikaskideen taldeen kontra egin zuten, beraz, beraien kontra jokatzea askoz ere dibertigarriagoa iruditu zitzaien ikasleei. Jolas guztiak bukatzean, ikasle eta irakasle guztiak frontoian elkartu ziren eta DBH1-2ko olinpiadetako irabazleak aurkeztu zituzten, eta ondoren DBH3-4ko irabazleak; azken horien artean hiru taldek berdindu zutenez, zozketa bat egin zuten eta talde txuriak irabazi zuen. Bi talde irabazleei, pastel bana eman zieten. Hori eta gero, bazkaltzera abiatu eta postrerako pastela jan zuten.

Bazkaldu ondoren, Pirinioetako kirolari batzuekin hitzaldiak izan zituzten; lehenengo, Iker Vicente (aizkolaria) eta Maider Ardanazek (pilotaria) haien historia ezagutarazi zieten ikasleei; ondoren, Patricia Viscarret (alpinista) eta Enara Oronozek (triatleta) haien ibilbidean izandako zailtasun batzuk eta hainbat abantaila kontatu zieten; eta bukatzeko, Laia Salsamendi (pilotaria) eta Aitor Alduntzinekin (pilotaria) ere hizketan egon ziren eta izandako hainbat lesiori eta txapelketei buruz galdetu zieten. Hainbat gauza galdetu eta ikasi zuten ikasleek, baita kirolariek ere.

Oso egun polita izan zen, ikasleak eta irakasleak oso gustora egon ziren eta dena ongi atera zen, Erronkariko autobusa matxuratu zen arren. Gazteen arteko erlazioa sendotu zuten eta kirola egiten egon ziren.

Iragan urriaren 23an DBH 4ko Geologia ikasleok irteera egin genuen Arpeara Otsagiko ikastetxekoekin batera. Pirinioko ikastetxeen arteko lankidetza proiektu honetan, gure inguruneko ondare natural eta geologikoa aztertzeko aukera izan genuen.

Urriaren 22an Auñamendiko eskoletako Haur eta Lehen Hezkuntzako ikasleak Iruñera joan ginen.

Txikienak Kili-Kili jolas parkera joan ziren eta Lehen Hezkuntzakoak Saltoka Jump parkera.

Primeran pasa genuen eta inguruko eskoletako lagunekin egoteko egun ederra izan zen.

“Encuentros de Pamplona/Iruñeko Topaketak” Baluarte Fundazioak antolatutako kultura, arte eta pentsamenduaren nazioarteko bienalak dira.

Iruñeko Topaketen Eskola esperimentazioa, pentsamendua eta diziplina artistikoen gurutzaketa uztartzen dituen hezkuntza-gunea da, haur eta gazteei arreta ematen diena. Eskola honek Nafarroako Landa Eremuko eskolei tailerrak egiteko aukera eskaini die. Lehenengo edizio honetan, Marina Lameiro, Xabier Erkizia, Peru Galbete, Ghislaine Verano eta Naiara Gorostidi arduratu dira tailer horiek diseinatu eta egiteaz. Bakoitza bere arte-disziplinatik abiatuta eskolekin lankidetzan aritu dira beren esperientzia eta metodologia propioak txertatzeko.

Garraldako eskolan Peru Galbete artistarekin film kolektibo bat sortu genuen.

Peru bi egunez egon zen Lehen Hezkuntzako 3., 4., 5. eta 6. mailako ikasleekin lanean. Etxetik haiendako balioa zuen objektu bat ekarri zuten, baita honekin loturiko soinu bat. Ekarritakoarekin argazki muntaia eta film kolektiboa osatu zuten.

Urriaren 8an antolatzaileek Iruñera gonbidatu zituzten ikasle partehartzaileak. Bertan haien lanekin egindako erakusketa ikusi zuten Condestable jauregian. Ondoren, Baluarten, Iruñeko Topaketetan parte hartu duten artisten lanak ikusi zituzten.

https://www.losencuentrosdepamplona.com/eu/escuela/