Berriak

“Kanpo Lana” programa prozedura bat da, bizikidetzaren kontrakoak edo harentzako oso kaltegarriak izan daitezkeen jokabideei erantzuteko helburua duena. Honela, ohi bezala ikastetxetik kanporatu beharrean, neurri eraginkorragoak eta hezigarriagoak eratzea da asmoa: erasoa jasan duenaren aldeko neurriak, ikasleen gogoeta eraginen dutenak eta balioak erakutsiko dituztenak, ikasleen alderdi positiboak indartuko dituztenak. Programaren funtsa da ikastetxera joan beharrean, gizarte arloko entitate batera joatea, heziketa lan bat egitera. Entitateak prozesuaren egunez egunekoa kudeatzen du eta ikastetxeak darama haren kontrola. Programa ikasle bakoitzarentzat pertsonalizatua da.

Legearen ikuspegitik, ikastetxera joateko eskubidea galtzea da eta, horregatik, familiaren onarpena behar du. Nafarroako Gobernuaren eta entitate lankideen artean adostutako prozedura da, hitzarmen bidez –entitate publikoen kasuan– edo akordio bidez –entitate pribatuen kasuan–. Erantzukizun zibila entitate lankidearena da.

DBH 2ko ikasleok soinu eta argi uhinen inguruko proiektu bat egin dugu Fisika-Kimika ikasgaian, uhinak nolakoak diren eta nola transmititzen diren ezagutzeko.

Geure inguru hurbileko soinuak grabatu eta uhinak neurtzeko erabiltzen den osziloskopio birtual baten laguntzaz, uhin grafiko bihurtu dugu,soinugrama deiturikoak. Irudi hauek, espektro kromatikoan dauden kolore guztiekin margotzen saiatu gara, oinarrizko koloreak soilik erabilita.

Jolas bezala planteatu dugu, soinua entzunda, uhinaren marrazkiarekin lotu behar baita. Saiatu nahi baduzue, eskolako goiko solairuan duzue aukera, laborategi ondoan.Hor ere aukera izanen duzue ilusio optiko batzuekin harritzeko, geure begiek batzuetan, ziria sartzen digutelako.

Martxoaren 25ean “Musikariak eskolan” programaren baitan Paxkal irigoien baxenafartarraren bisita izan genuen gure eskolan. Musikaren munduan duen ibilbideari buruz hitz egin zigun, eta bere esperientziak partekatu zituen 3.DBH eta 4.DBHko ikasleekin.

Ikasle batzuk animatu ziren berarekin abesti bat jotzera eta abestera, eta giro ederra sortu zen. Gainera, bere instrumentuak ezagutzeko aukera izan genuen, eta oso interesgarria izan zen. Bisita dantza batekin amaitu genuen.

Eskerrik asko, Paxkal, bisitagatik!

Martxoaren 10etik 12ra DBH 3koak Bertizen egon ginen. Lehenengo egunean, goizean, Bertiz Abentura Parkera joan ginen eta zuhaitzen artean egon ginen. Arratsaldean, berriz, ugeldera piragua egitera joan ginen. Bigarren egunean, ferrata bidea eta tirolinak egin genituen goizean. Arratsaldean, arroil jaitsiera eta uretatik ibili ginen saltoak egiten.

Azken egunean, Bertizeko parke botanikoan egon ginen, jinkana egiten eta zuhaitz motak ikusten.

Narbarteko aterpean zeuden langileak oso jatorrak ziren. Eman ziguten zerbitzua eta janaria oso ona zen. Berako Toki Ona institutuko ikasleekin egon ginen eta haiekin aktibitateak egin genituen. Kanpaldi ederra izan da eta oso gustura egon gara.

Martxoaren 17tik 21era, 2025-2026 ikasturteko HH-LHko IKASLE BERRIEN aurrematrikula egiteko epea ireki da.

Aurrematrikula egiteko inprimakia hemen deskargatu dezakezue.

Hala ere, familiek, nahi izanez gero, online egiteko aukera izango dute, EDUCAn.

Zalantzarik izanez gero, jarri ikastetxearekin harremanetan 948 764101 telefonoan edota cpgarral@educacion.navarra.es helbide elektronikoaren bidez. 

Zorionak txapeldunei! Futbitoko txapelketako final zirraragarri baten ondoren, gure eskolak irabazle berriak ditu. Partida bikaina izan da, eta bi taldeek erakustaldi ederra eskaini digute.