Berriak

Abenduaren 7an Euskararen eguna ospatu genuen Garraldako Eskolan. Lehenik eta behin, HH eta LHko ikasleek ipuin kontaketa izan zuten. Hori eginda, “Pirata Garrapataren abenturak” antzerkiaz gozatu zuten. Errekreoa eta gero, batzuk serigrafia egiten zuten bitartean, bertzeek furor jolasa egin zuten. Hori bukatuta, HHko ikasleak saltokara joan ziren, eta bitartean, LHkoek serigrafia egin zuten.
Bestalde, DBHko ikasleak bi taldetan banatu ginen. Lehenik eta behin, DBH1 eta 2koek serigrafia egin zuten, eta bitartean, DBH3 eta 4koek meme lehiaketan barre batzuk bota genituen. Gero, ekintzak trukatu genituen. Errekreoa eta gero, DBH guztia elkartu ginen Kike Amonarrizen hitzaldi interesgarria entzuteko. Eguna bukatzeko, dantzaldia egin genuen. Gainera, eguerdian eskola guztia elkartu ginen, elkarrekin abestu eta gozatu genuen.

Lerro hauek baliatu nahi ditugu Euskara Zerbitzuei eskerrak emateko, Kike Amonarrizen hitzaldia finantzatu baitzuten. Bertzalde, eskerrak eman Garraldako Udala eta Euskarabideari, antzerkia antolatu zigutelako.

Egun ederra izan zen, euskaratik eta euskaraz, eta serigrafiarako egin genuen logo lehiaketako esaldiak dioen bezala, Uskara agos ago!

Urtero bezala heldu den abenduaren 7an, ortzeguna, eskolan Euskararen Eguna ospatuko dugu. Hainbat ekintza eginen ditugu egunean zehar.

Eskerrak eman nahi diegu zonaldeko erakundeei DBHko ikasleentzako Kike Amonarrizen hitzaldia Euskara Zerbitzuek finantzatu baitigu eta HH/LH-koentzako antzerkia berriz, Euskarabidea eta Garraldako Udalak antolatu dutelako.

Azaroaren 25ean, eskolako ikasle guztiok indarkeria matxistaren kontrako ekintza bat egin genuen. Ekintza honetan, Garraldako plazan elkartu ginen, han sua piztu genuen eta bertara bota genituen matxismoarekin eta indarkeria matxistarekin bukatzeko hitzak, esaldiak…

Urriaren 23an Haur eta Lehen Hezkuntzako ikasleek zonaldeko eskoletako lagunekin ateraldia egin genuen. Luzaide-Arnegi, Auritz, Auzperri eta Erroko ikasle eta irakasleak hobe ezagutzeko aukera izan genuen.

Txikienak Kili-kili jolas parkean egon ginen: salto, txiribuelta, eskalada gora, txirristatik behera… ze gustora!

Ertainek Uharteko izotz pistan irristaketa egin genuen. Ipurdikoren bat hartu genuen… baina oso dibertigarria izan zen.

Handienak ParkePolon bide heziketa ikasten egon ginen. Oinezkoak izan ginen, eta baita kart-etan gidari ere!

Urriaren 20an, DBH guztia Sarara, Lapurdi, joan ginen bertan IKUSI MIKUSI Haur eta gazteentzako liburu azoka baitzen, eta han, hainbat ekintza egin genituen.

Sarara iritsitakoan, frontoi batera joan ginen eta han, hamaiketakoa hartu genuen. Hamaiketakoa hartuta, frontoian bertan zegoen liburu azokara joan ginen eta 15 euroko bono bat eman ziguten azokan gastatzeko; Han, hainbat eleberri, hainbat komik, hainbat koadernotxo… zeuden.
Beranduago, etxe batera joan ginen tailer ezberdinak egitera. DBH 1ekoak Joxe Mari Carrererekin egon ziren, bere ipuin kontaketaz gozatzen. Eta DBH2-koek, Galtzagorrik proposatutako Boouktube tailerra izan zuten. DBH 3-4-koak, berriz, Asisko Urmenetarekin egon ginen, berak, karikaturak egiten erakutsi zigun eta karikaturen inguruko hainbat informazio eman zigun. Gainera, bakoitzak gure lagun baten aurpegia kontuan hartuta, gure karikatura propioak egin genituen.
Karikaturak bukatuta, aterpe batera joan ginen bazkaltzera euriarengatik.
Bazkaldu eta gero, Sarako lezeetara joan ginen eta DBH1-2 eta DBH 3-4 bi taldetan banatu ginen. Batzuk leizeetan zeuden bitartean, besteak han zegoen museo txiki batera joaten ziren. Egia erran, Sarako lezeak oso interesgarriak dira.

Eguna euritsua bezain ederra izan zen!

Garraldako ikastetxeko irakasle, ikasle eta gurasoek Elkarbizitzaren Alde-ko kontzentrazioa burutu dugu eskolako atarian. Eta hauxe da mobilizazio honi lotura argitaratutako irakurketa:

Garraldako ikastetxe publikoan elkarbizitza gure proiektuaren ardatzetako bat da. Gure eskolan beti egin izan den bezala, ikasturte hasiera honetan ere lanean ari gara norabide horretan.
Halaber, azken boladan eskolan eraso onartezinak jasan dira. Jarrera hauekin amaitzeko, guztien elkarlana eta jarrera aktiboa ezinbestekoak dira, berriro horrelako gertaerak bizi ez ditzagun. Irakaslegoak babesgabetasun sentimendua du, eta ez dugu nahi hezkuntza komunitate osoan horrelako sentimendurik hedatzea, ez irakasle, ez ikasle ezta langileen artean ere.
Bai ikastetxean, bai etxean, gertakari hauen inguruko gogoeta egitea ezinbestekoa da. Guztion elkarlanarekin bakarrik lortuko bait da honelako ekintzak errotik ezabatzea eta eragindako kalteen erreparazioa (ekonomikoa zein pertsonala) bermatzea.
Azkenik, gertakarien larritasunaren aurrean honelako ekintzak ez ditugula onartzen adierazi nahi dugu eta bizikidetzaren alde lanean jarraituko dugula aldarrikatu. Hala nola erasoa jasan dutenei babesa helarazi.