Berriak

Auñamendiko Disziplinarteko Ikaskuntza

Ikasturte honetan Auñamendi Disziplinarteko Ikaskuntza (ADI) proiektua jarri dugu martxan Garraldako Institutuan. Gai zentrala “Munduko Herriak” hartuta, diziplinarteko proiektu bat garatu dugu DBHko 1., 2. eta 3. mailako ikasleekin. Proiektua hiru egunekoa izan da (martxoaren 30a, martxoaren 31 eta apirilaren 1a), eskolako ordutegian.
Ekimen honekin, guztion artean, bizikidetzan, inklusioan eta aniztasunarekiko errespetuan oinarritutako eskola eraikitzen jarraitu nahi dugu. Gure helburua identitate partekatua sustatzea da, pertsona bakoitzak gure hezkuntza-komunitateari ematen dion enpatia, lankidetza eta aberastasuna balioetsiko dituena.
Arlo kurrikular guztiek modu koordinatuan parte hartu dute hainbat jardueratan, eta, talde lana, ahozko eta idatzizko produkzioak, ekintzailetza eta, orokorrean, oinarrizko gaitasunak garatzea izango da helburua.
Proiektu hau martxan jartzeko, Manex Erdozaintzi Etxart Kolegioarekin (MEEK) elkarlanean aritu gara. Beraien eskola bisitatzen egon gara eta haien jarduna oso baliagarria izan zaigu gure lana aurrera eramateko. Eskola horrek hamarkada bat baino gehiago darama, ikasturtero, Ikasgaien Arteko Lan Astea (IALA) proiektua garatzen, eta beren jakituria gogoz helarazi digute.
Irakasleok ilusio, lan eta mimo handiz prestatu dugu proiektu hau, eta ikasleek modu egokian erantzun diote ikasteko modu berri honi.

Martxoaren 20an KORRIKA Garraldatik pasa zen eta ikasleek lekukoa eramateko aukera izan zuten.

Giro ederra sortu zen goizean goizetik eta partehartzea handia izan zen.

Esker mila Guraso Elkarteari prestatutako gosariarengatik!

Ikusi hemen eskolako kilometroaren bideoa:

Aurreko ostiralean, DBH3-4ko ikasleekin Irunberrira joan ginen bertako batxilergoa eta lanbide heziketa eskaintza ikustera. Modu honetan, gure ikasleek aurrez aurre ikusi zuten, ikasketa hauek egiten ari diren ikasleen egunerokotasuna.

Komunikazio tailerreko ikasleek erreportaje batzuk egin zituzten eta, kasualitatez, denek emakumezkoei egin zizkieten elkarrizketak. Hori dela eta, Martxoak 8rako emakume horiek aipatutako ideia garrantzitsuak jarri ditugu erakusketa batean. Erakusketan Arantza Inchausti, Miren Cia, Leire Reta, Uxue Garcia eta Nahia Barberena ditugu.

Datorren Martxoaren 9tik 13ra bitarte 2026-27 ikasturterako aurrematrikula egiteko epea izanen da. Informazio gehiago cpgarral@educacion.navarra.es helbide elektronikoan edo 948 764401 telefonora deitu.

Pozgarria izan da eskolan atzo Amancay Gaztañaga idazlearen bisita jasotzea. DBH1 eta DBH2ko ikasleek berriki irakurri dute haren lana, Martin Martina eta Urrezko orraziaren misterioa, eta oraingoan aukera paregabea izan dute liburuaren atzean dagoen sortzailea aurrez aurre ezagutzeko.

Topaketan zehar, ikasleek galdera ugari egin dizkiote: idazlearen ogibideari buruz, istorioko pertsonaien sorrera eta garapenaz, baita sorkuntza-prozesuari buruz ere. Jakin-min handiz entzun dituzte Amancayren azalpenak, eta benetan aberasgarria izan da erantzun guzti horiek lehen eskutik jasotzea.

Esperientzia motibagarria izan da, irakurzaletasuna sustatzeko eta euskarazko literaturarekiko interesa pizteko aukera bikaina.