Berriak

Laguntza Programa pertsonen arteko tratu onak sustatu nahi dituen ikuspegi bat da, gatazken prebentzioan eta kudeaketan oinarritzen dena. Filosofia honek hezkuntza komunitate osoa barne hartzen du: ikasleak, irakasleak eta eskola langileak, familiak eta ingurua.

Bidaia hau irailean hasi genuen eta amaierarik gabeko prosezu honetan honakoak lortu nahi ditugu denok batera: ERRESPETUA, ELKARBIZITZA OSASUNTSUA, ELKARTASUNA, AFEKTUZKO HARREMANAK, ANIZTASUNA BESARKATZEA, ENTZUTEN IKASTEA, ENPATIA GARATZEA…

Hemen Laguntza Programaren informazio guztia uzten dizuegu: https://convivencia.educacion.navarra.es/eu/programa-laguntza

IkasNOVA 23/24 ikasgelen deialdian lortutako dirulaguntzari esker, IkasNOVA gela sortu da Garraldako eskolan. Ikasgela hau ikasteko leku aktiboa da, ikasteko modu desberdinak eta askotarikoak esperimentatu ahal izateko, eta, bertan, hitz eginez, elkarlanean eta berdintasunezko testuinguru batean partekatuz ikasten da. Altzari malguak eta mugikortasun handikoak aukera ematen dute esperientziazko, partaidetzazko eta digitalizatutako lanak egiteko. Funtsezko gaitasunak eta gaitasun espezifikoak garatzeko gela egokiak dira, ikasle guztien inklusioa errealitate bihurtzeko, Ikaskuntzarako Diseinu Unibertsalaren jarraibideei jarraituz. Gainera, ikasgelari ematen zaion teknologiak balio erantsia ematen dio, hau da, lana aberasten du eta ikaskuntza hobetzen du, konpetentzia digitalaren garapena bermatuz.

Azaroak 27an, Bidausi Mankomunitateak, Auñamendiko Gizarte Zerbitzuak eta Auritzeko Osasun zentroak elkarlanean sortu duten proiektuaren aurkezpena izan genuen eskolan.

Honela, gure ikasleei, konpresa berreralbigarriak, kopa menstrualak eta hileko kuleroak aurkeztu zitzaizkien, hondakinak gutxitzeko irtenbide gisa.

Gainera, neska bakoitzari produktu hauen kit bat banatu zitzaien.

Ikasturte honetan, IkasNOVA gelarekin batera, txoko berri bat sortu da eskolako beheko solairuan.

Espazio honi bizia emateko asmoz, eskolako SKOLAE batzordeak hezkidetzarekin zer ikusia duten gaien inguruko materialak eta proposamenak bertara eramanen ditu.

Lehendabiziko gaia, azaroaren 25a aitzaki, EMAKUMEEN AURKAKO INDARKERIA DESAGERRARAZTEKO EGUNA izan da.

HH, LH eta DBHko ikasleendako proposamenak egon dira bertan aste hauetan zehar: tratu onen eta txarren inguruko hausnarketa, burua astintzeko galderak, gaiaren inguruko irudiak, LH4-5-6koek egindako eskultura zoragarria, ipuinak, eta abar.

Honetaz gain, azaroaren 25ean bertan DBHko ikasleek indarkeriaren gaiarekin loturiko filmaren lanketa egin zuten. LH eta HHko ikasleek ere jolas batzuk egin zituzten, baita txokoa apaintzeko esku moreetan mezuak idatzi ere.

Azaroaren 13an Ornitolanekoekin batera ornitologoek hegaztiak nola eraztuntzen dituzten ikasi dugu . Teknika honekin , sareen bidez txoriak harrapatu eta neurtu eta pisatu ostean, eraztuna jartzen zaie. Horrela, sailkatu eta kontrolatu daitezke ikerketa zientifiko ezberdinetan. Amilotxak,gailupak,buztanluzeak…txori txiki ezberdinak, baina ehundaka kilometro bidaiatu dezaketenak.

Azaroaren 6an Pirinio osoko eskoletako DBHko ikasle euskaldunek Piritopaketa bat izan zuten Otsagabian. Urtean behin egiten dira Piritopaketak, bakoitza bailara batean eta aurten Zaraitzuri egokitu zaio. Asteazken horretan joku olinpikoak eta Pirinioko kirolariekin hitzaldiak egin zituzten. Lehenik eta behin, olinpiadetarako irakasleak eta ikasleak taldeetan banatu ziren: DBH1-2n bost talde egin ziren, DBH3-4n beste bost eta irakasleak bi taldetan. Bost joku egon ziren: zonbi jolasa, boley bola, oreka-erronka, herri-kirolak eta futbola. Taldeka, Otsagabiko toki desberdinetara joaten ziren eta han zenbait jolas egiten zituzten, talde bat beste baten kontra. Irakasleen taldeek ere ikaskideen taldeen kontra egin zuten, beraz, beraien kontra jokatzea askoz ere dibertigarriagoa iruditu zitzaien ikasleei. Jolas guztiak bukatzean, ikasle eta irakasle guztiak frontoian elkartu ziren eta DBH1-2ko olinpiadetako irabazleak aurkeztu zituzten, eta ondoren DBH3-4ko irabazleak; azken horien artean hiru taldek berdindu zutenez, zozketa bat egin zuten eta talde txuriak irabazi zuen. Bi talde irabazleei, pastel bana eman zieten. Hori eta gero, bazkaltzera abiatu eta postrerako pastela jan zuten.

Bazkaldu ondoren, Pirinioetako kirolari batzuekin hitzaldiak izan zituzten; lehenengo, Iker Vicente (aizkolaria) eta Maider Ardanazek (pilotaria) haien historia ezagutarazi zieten ikasleei; ondoren, Patricia Viscarret (alpinista) eta Enara Oronozek (triatleta) haien ibilbidean izandako zailtasun batzuk eta hainbat abantaila kontatu zieten; eta bukatzeko, Laia Salsamendi (pilotaria) eta Aitor Alduntzinekin (pilotaria) ere hizketan egon ziren eta izandako hainbat lesiori eta txapelketei buruz galdetu zieten. Hainbat gauza galdetu eta ikasi zuten ikasleek, baita kirolariek ere.

Oso egun polita izan zen, ikasleak eta irakasleak oso gustora egon ziren eta dena ongi atera zen, Erronkariko autobusa matxuratu zen arren. Gazteen arteko erlazioa sendotu zuten eta kirola egiten egon ziren.