DBH 3-4ko ikasleek, Pornografiaren inguruko hitzaldia jaso dute, pornografiaren ondorioen prebentzioan aditua den Miren Cía Urrutia-ren eskutik. Bertan pornografiaren munduaz eta kontsumoak dituen ondorioetaz jardun dira.
Reciclón saria: PIRITRAK
Maiatzak 9an, LH 4.5. eta 6. mailakoak Iruñara joan ginen “Reciclón” lehiaketan irabazi genuen saria jasotzera.
Material birziklatua erabiliz maskota bat egin genuen eta denbora dexente eskeini genion: PIRITRAK (traktore/animalia). Azkenean, finalera iritsi ginen baina ez genuen bozka nahiko lortu sarituak izateko. Gure harridurarako, epaimahaikoek Accesita eman ziguten. Irabazleen sari berdina jaso genuen, Sendaviva-ra irteera. Saria Bidausi Mankomunitateko lehendakari den Joxepe Irigarayk eman zigun, beste batzuen artean.
Bukatzeko, aprobetxatu nahi genuke bozkatu gaituzuen guztioi eskerrak emateko. Eskerrik asko bihotzez!
BIBA GARRALDAKO ESKOLA! GORA PIRINIOAK! GORA BIRZIKLAPENA! GORA SORMENA!
2., 3. eta 4.DBHko ikasleak historian arrastoa utzi duten emakume artistak eta zientzialariak omentzen
Aurreko asteetan, gure eskolako 2., 3. eta 4. DBHko ikasleak proiektu interesgarri eta aberasgarri batean murgildu dira: historian zehar garrantzia izan duten emakume artista eta zientzialarien bizitza eta lana ezagutzea.
Bikoteka lan eginez, ikasleek emakume ezberdinen biografia eta ekarpen nagusiak ikertu dituzte. Horren emaitza izan da emakume bakoitzaren bizitza eta lanaren inguruko laburpen orri bat, baita haien obraren baten adierazpen artistiko edo zientifiko bat ere.
Hurrengo asteetan lan hauek goiko pasabidean izanen dituzue ikusgai. Anima zaitezte etortzera eta ikustera!
John Andueza idazlearekin
Apiril hasieran “Liburuak Gozagarri” programarekin John Andueza idazlearen bisita izan zuten DBHko ikasleek. Idazlea etorri aitzinetik DBH 1-2ko ikasleek bere “San Ferminetan Lesakan” liburua irakurri zuten eta DBH 3-4koek, berriz, “Para Bellum”.
John Anduezaren abentura bizitza eta ideia eta proiektu interesgarriak ezagutzeko parada ederra izan genuen.
“KANPO LANA” PROGRAMA MARTXAN
“Kanpo Lana” programa prozedura bat da, bizikidetzaren kontrakoak edo harentzako oso kaltegarriak izan daitezkeen jokabideei erantzuteko helburua duena. Honela, ohi bezala ikastetxetik kanporatu beharrean, neurri eraginkorragoak eta hezigarriagoak eratzea da asmoa: erasoa jasan duenaren aldeko neurriak, ikasleen gogoeta eraginen dutenak eta balioak erakutsiko dituztenak, ikasleen alderdi positiboak indartuko dituztenak. Programaren funtsa da ikastetxera joan beharrean, gizarte arloko entitate batera joatea, heziketa lan bat egitera. Entitateak prozesuaren egunez egunekoa kudeatzen du eta ikastetxeak darama haren kontrola. Programa ikasle bakoitzarentzat pertsonalizatua da.
Legearen ikuspegitik, ikastetxera joateko eskubidea galtzea da eta, horregatik, familiaren onarpena behar du. Nafarroako Gobernuaren eta entitate lankideen artean adostutako prozedura da, hitzarmen bidez –entitate publikoen kasuan– edo akordio bidez –entitate pribatuen kasuan–. Erantzukizun zibila entitate lankidearena da.
SOINUA IKUS DAITEKE? IKUSTEN ARI ZARENA BENETAKOA AL DA?
DBH 2ko ikasleok soinu eta argi uhinen inguruko proiektu bat egin dugu Fisika-Kimika ikasgaian, uhinak nolakoak diren eta nola transmititzen diren ezagutzeko.
Geure inguru hurbileko soinuak grabatu eta uhinak neurtzeko erabiltzen den osziloskopio birtual baten laguntzaz, uhin grafiko bihurtu dugu,soinugrama deiturikoak. Irudi hauek, espektro kromatikoan dauden kolore guztiekin margotzen saiatu gara, oinarrizko koloreak soilik erabilita.
Jolas bezala planteatu dugu, soinua entzunda, uhinaren marrazkiarekin lotu behar baita. Saiatu nahi baduzue, eskolako goiko solairuan duzue aukera, laborategi ondoan.Hor ere aukera izanen duzue ilusio optiko batzuekin harritzeko, geure begiek batzuetan, ziria sartzen digutelako.
